يم الغثيث ...

يم الغثيث غزير .... كيف ماطعن جساس خي الزير ... طعنني اميامك .

يم الغثيث اكداس .... كي طعن هذبك ما كنيني قـــــــــــــــــــــــــــــــــاس

وحق من خلق زولك وكل الناس ... نظرة اعيونك مالها تفسيـــــــــــر

اتخلي التايب ايعاود ادمان الكاس ... ومدمن شراب الكاس شيخ كبير

واتخلي الفارس اللي شديد الباس ... ايسلم لقواتك ايكون اسيـــــــــــر

ايخيلن علي زولك جميع البـــــاس ... متناسقة متفوقة عالغيـــــــــــــر

ولك جسم متناسق ورفعــــة راس ... امعا دور يسفا اتقول حريـــــــر

انتِ نوع نادر من انواع المــــاس ... من حاز زولك حاز كل الخيــــــر

ياما نظرنا من جمال اجنـــــــــاس ... كيفه جمالك ما هناك نظيـــــــــر

الله يجعلك ديمه قمر ونــــــــــاس ... من العين يحفظك يم الغثيث غزير